May 26, 2026
Domingu liuba (24/05), grupu ida husi Philanthropy Asia Alliance (PAA) vizita sítiu projetu RESTORE iha Ulmera, Tibar, Munisípiu Liquica atu observa servisu restaurasaun ambiental ne’ebé atualmente implementa husi Conservation International Timor-Leste liuhosi Projetu RESTORE.
Durante vizita ne’e, delegasaun aprende kona-ba esforsu lidera husi komunidade atu restaura rai degradadu, hadi’a biodiversidade no hametin reziliénsia klima iha área refere. Membru komunidade lokál sira mós aprezenta sira-nia servisu kona-ba prepara ai-horis, jere viveiru no kuidadu ai-oan sira atu suporta atividade reflorestasaun no restaurasaun ekosistema ba tempu naruk.
Vizita ne’e mós destaka papel importante feto sira nian iha lidera no suporta atividade RESTORE iha nivel komunidade. Feto sira ne’ebé envolve iha projetu ne’e kontribui ativamente ba jestaun viveiru, preparasaun ai-horis, sensibilizasaun ambiental no inisiativa moris sustentavel, ne’ebé hatudu lideransa forte iha esforsu restaurasaun no dezenvolvimentu komunidade.
Reprezentante feto sira husi grupu komunide RESTORE, Nelia de Jesus Correia Soares aprezenta informasaun kona-ba atividade kuidadu viveirus ba delegasaun doadór sira. Sira fahe esperiénsia kona-ba jestaun ai-horis, manutensaun viveiru no apoiu ba atividade restaurasaun, ne’ebé hatudu envolvimentu forte husi feto no juventude lokál iha inisiativa konservasaun ambiental.
Enkuantu reprezenate Grupu prosesamentu feto, Sra. Agusta Silva, aprezenta produtu lokál sira ba delegasaun PAA, hanesan duut tasi ne’ebé prosesadu sai jelly, produsaun masin tradisionál no produsaun tua lokál.
Inisiativa sira ne’e hatudu katak restaurasaun ambiental bele mós suporta moris komunidade no empoderamentu ekonomia ba feto sira.
Vizitante sira iha oportunidade ko’alia diretamente ho grupu komunidade sira no haree rasik dedikasaun no kolaborasaun iha esforsu restaurasaun ne’e. Vizita ne’e destaka importánsia parseria no asaun hamutuk atu promove inisiativa konservasaun sustentavel iha Timor-Leste.
Conservation International Timor-Leste hato’o agradesimentu ba vizita no apoiu kontinuu ba restaurasaun ambiental no empoderamentu komunidade iha rai-laran tomak.
Hamutuk, Ita Apoia Konservasaun Ne’ebé Lidera Husi Komunidade Sira, Atu Kria Futuru Ida Ne’ebé Verde no Sustentável Liu.