Pombu Verde Timor Bele Lakon Hotu se la Iha Asaun Urjente

(18 Maiu 2026, Dili, Timor-Leste): Pombu verde timor agora hasoru ameasa bo’ot tanba kasa no mos tanba lakon nia abitat ai-laran. Manu ida-ne’e agora hetan deit iha Timor-Leste no bele lakon hotu hosi mundu iha tempu badak. Peskiza foun hosi 𝐂𝐡𝐚𝐫𝐥𝐞𝐬 𝐃𝐚𝐫𝐰𝐢𝐧 𝐔𝐧𝐢𝐯𝐞𝐫𝐬𝐢𝐭𝐲 𝐧𝐨 𝐁𝐢𝐫𝐝𝐋𝐢𝐟𝐞 𝐈𝐧𝐭𝐞𝐫𝐧𝐚𝐭𝐢𝐨𝐧𝐚l husu atu klasifika espésie ida-ne’e hanesan “𝐂𝐫𝐢𝐭𝐢𝐜𝐚𝐥𝐥𝐲 𝐄𝐧𝐝𝐚𝐧𝐠𝐞𝐫𝐞𝐝”, ne’ebé mak nivel ameasa aas liu antes lakon hotu. Ida-ne’e bele tau atensaun boot liu, apoiu finanseiru, no protesaun forte atu salva espésie ida-ne’e.

Estudu, ne’ebé publika iha revista Oryx ne’e, hatudu evidénsia klaru liu kona-ba redusaun lalais hosi espésie ida-ne’e, ne’ebé agora estimasaun menus husi individu 500 iha Timor-Leste, no provavelmente lakon ona iha nasaun viziñu Indonsia.

𝐉𝐚𝐟𝐞𝐭 𝐏𝐨𝐭𝐞𝐧𝐳𝐨 𝐋𝐨𝐩𝐞𝐬, 𝐚𝐮𝐭𝐨𝐫 𝐢𝐝𝐚 𝐡𝐨𝐬𝐢 𝐂𝐨𝐧𝐬𝐞𝐫𝐯𝐚𝐭𝐢𝐨𝐧 𝐈𝐧𝐭𝐞𝐫𝐧𝐚𝐭𝐢𝐨𝐧𝐚𝐥, hateten:

“Hau moris iha munisipiu Lautém no servisu ona hanesan konservasionista durante tinan barak. Maibé buat barak iha mudansa ona. Tinan sanulu liubá, ita bele lao atu haree pombu verde timor, maibé agora nia iha deit iha área sira ne’ebé remotas no susar atu asesu.

“Susar tebes atu konvense kasador sira atu muda sira nia hahalok, tanba ida-ne’e parte hosi kultura. Maibé hau hanoin ita presiza husu ba sira oinsá sira sente se manu ida-ne’e lakon hotu. Kasador sira bele gosta han nia isin, maibé se la iha mudansa lalais, sei laiha tan ida mak atu kasa.”

Estudu ne'e bazeia ba peskiza iha kampu liu loron 1.400 husi autór sira entre tinan 2002 no 2025 iha área Timor-Leste nian, ne'ebé kobre Timor-Leste, Ilha Jaco, Timor Osidental, Ilha Rote, no Ilha Semau. Dadus istóriku no kontemporániu seluk hosi ornitólogu no observador manu fuik sira, husi tinan 1969 mai to’o agora, mós inkluidu iha estudu ne’e.

Iha total, iha rekordu 𝟗𝟔 kona-ba pombu verde timor, ho 𝟕𝟒 iha Timor-Leste, no maioria hosi ne’e iha Munisipiu Lautém. Maioria hosi observasaun sira (𝟖𝟐%) hetan iha área protejida sira, liuliu iha Parke 𝐍𝐚𝐬𝐢𝐨𝐧𝐚𝐥 𝐍𝐢𝐧𝐨 𝐊𝐨𝐧𝐢𝐬 𝐒𝐚𝐧𝐭𝐚𝐧𝐚.

Bazeia ba avaliasaun hosi dadus hotu, autor sira estima katak agora hela deit restu entre individu 𝟏𝟎𝟎–𝟓𝟎𝟎, no sira suspeita katak númeru lolos bele menus liu hosi estimativa ida-ne’e.

𝐃𝐫. 𝐂𝐨𝐥𝐢𝐧 𝐓𝐫𝐚𝐢𝐧𝐨𝐫, autor ne’ebe lidera estudu ne’e, hateten:

“Hau mai Timor-Leste ba dala uluk iha 2002. Hau ba Tutuala iha munisipiu Lautém, depois lao kilometru 8 tuir tasi ibun no haree manu pombu verde timor ba dala uluk. Iha tempu ne’ebá la difísil atu haree sira iha ai-laran diak. Maibé ida-ne’e emosionante tebes tanba espésie ida-ne’e hetan deit iha Timor no illa viziñu balu.

“Hau remata hau nia servisu terenu iha 2006, maibé hau kontinua fila ba Timor-Leste ho hau nia osan rasik. Maski 𝐍𝐚𝐬𝐢𝐨𝐧𝐚𝐥 𝐍𝐢𝐧𝐨 𝐊𝐨𝐧𝐢𝐬 𝐒𝐚𝐧𝐭𝐚𝐧𝐚. estabelese iha 2008, ida-ne’e seidauk bele prevene redusaun lalais hosi espésie ida-ne’e no espésie seluk barak iha área ne’e.

Desde 2004 — bainhira hau hetan rekordu rua iha Ilha Rote, iha Timor Barat — hau la hetan tan rekordu ida iha fatin seluk sai husi Munisipiu Lautém iha Timor-Leste. Ida-ne’e hatudu katak agora sira restritu liu ba distritu ida-ne’e ne’ebé nia ai-laran sei diak.”

“Triste tebes haree katak restu-uitoan deit husi manu-pombu verde timor. Agora ita presiza governu, organizasaun konservasaun no komunidade lokál atu hamutuk hodi prevene espésie ida-ne’e atu lakon to’o hotu.”

𝐃𝐫. 𝐂𝐨𝐥𝐢𝐧

Ilha Timor parte hosi Wallacea, área ida ne’ebé separa fauna Ázia no Austrália, no iha espésie barak ne’ebé la hetan iha fatin seluk iha mundu (espésie endémika).

Manu pombu verde Timor, manu ida ho kor hanesan has tasak matak-mean, mak ida hosi espésie endémika sira-ne’e. Nia tama iha família Columbidae (pigeon and doves), ne’ebé mak família manu ida hosi ameasadu liu iha mundu. Maski klasifika ona hanesan “Endangered” desde 2000, seidauk iha asaun boot atu proteje espésie ida-ne’e.

𝐀𝐥𝐞𝐱 𝐁𝐞𝐫𝐫𝐲𝐦𝐚𝐧,, Senior Red List Officer iha 𝐁𝐢𝐫𝐝𝐋𝐢𝐟𝐞 𝐈𝐧𝐭𝐞𝐫𝐧𝐚𝐭𝐢𝐨𝐧𝐚𝐥, hateten:

“Pombu verde timor agora bele sai ida hosi espésie manu ne’ebé besik liu atu lakon iha Wallacea — área biodiversidade importante ida ne’ebé famozu, nia espésie ameasadu barak. Ami nia konkluzaun mak katak espésie ida-ne’e provavelmente ona lakon funsionalmente iha Indonézia, tanba ne’e esforsu konservasaun iha Timor-Leste agora importante tebes ba nia sobrevivénsia. Timor-Leste durante ne’e hetan atensaun menus iha konservasaun, no ida-ne’e presiza muda lalais.”

𝐃𝐫. 𝐓𝐫𝐚𝐢𝐧𝐨𝐫 𝐤𝐨𝐧𝐤𝐥𝐮𝐢: “Maski situasaun ne’e grave tebes, sei iha esperansa ba pombu verde timor. Ameasa boot liu ba populasaun restu mai hosi kasador balu deit, tanba ne’e sei iha oportunidade atu muda sira nia hanoin liuhosi diálogu, apoiu finanseiru, ka kombinasaun rua ne’e.

Kasa parte hosi kultura lokál, maibé se la iha mudansa, iha tinan balu sei laiha tan manu-pombu verde timor atu kasa. Ita presiza asaun urjente, no presiza agora.”

Lee artigu“𝐓𝐡𝐞 𝐓𝐢𝐦𝐨𝐫 𝐠𝐫𝐞𝐞𝐧 𝐩𝐢𝐠𝐞𝐨𝐧 𝐓𝐫𝐞𝐫𝐨𝐧 𝐩𝐬𝐢𝐭𝐭𝐚𝐜𝐞𝐮𝐬 𝐨𝐟 𝐞𝐚𝐬𝐭𝐞𝐫𝐧 𝐈𝐧𝐝𝐨𝐧𝐞𝐬𝐢𝐚 𝐚𝐧𝐝 𝐓𝐢𝐦𝐨𝐫-𝐋𝐞𝐬𝐭𝐞 𝐦𝐚𝐲 𝐛𝐞 𝐨𝐧 𝐭𝐡𝐞 𝐯𝐞𝐫𝐠𝐞 𝐨𝐟 𝐞𝐱𝐭𝐢𝐧𝐜𝐭𝐢𝐨𝐧”, hosi 𝐂𝐨𝐥𝐢𝐧 𝐑. 𝐓𝐫𝐚𝐢𝐧𝐨𝐫, 𝐉𝐚𝐟𝐞𝐭 𝐏𝐨𝐭𝐞𝐧𝐳𝐨 𝐋𝐨𝐩𝐞𝐬, 𝐏𝐞𝐝𝐫𝐨 𝐏𝐢𝐧𝐭𝐨, no 𝐀𝐥𝐞𝐱 𝐉. 𝐁𝐞𝐫𝐫𝐲𝐦𝐚𝐧, 𝐧e'ebe publika iha 𝐎𝐫𝐲𝐱.